آيم-لبنانون - 11/19/2026 7:25:05 PM - GMT (+2 )
بعد أكتر من 13 سنة من الإنتظار، أطلقت شركة Rockstar Games لعبة GTA 6، لتتحوّل لواحد من أبرز الأحداث بتاريخ صناعة ألعاب الفيديو.
اللعبة اللي شهرتها سبقت إطلاقها، حطّت سقف جديد للتوقعات، مع نحو 15 مليون نسخة محجوزة مسبقاً، بحسب تقديرات Sensor Tower، وميزانية إنتاج قُدّرت بأكتر من مليار دولار.
والأرقام مش غريبة على هالسلسلة… فالجزء الخامس حقق مليار دولار خلال أول 3 أيام من إطلاقه، وباع نحو 235 مليون نسخة حول العالم.
والضغط ما اقتصر على الحماسة والطلبات المسبقة… فحجم اللعبة الضخم، اللي وصل لحوالي 212 غيغابايت، سبّب ضغط قياسي على شبكات الإنترنت حتى قبل الإطلاق، وسُجّلت حالات بطء ببعض المناطق.
ومع دخول ملايين اللاعبين لتحميل اللعبة، التحدّي الأكبر رح يكون قدرة شبكات الإنترنت ومنصات الألعاب على إستيعاب هالحجم من الطلب.
وبهالنسخة، اللاعبين بيرجعوا على Vice City، المدينة المستوحاة من ميامي، وبيعيشوا قصة ثنائي داخل عالم الجريمة، ضمن عالم مفتوح مليان تفاصيل وشخصيات ونشاطات، من محطات إذاعية لمطاردات ومغامرات.
بس بلبنان، القصة إلها جانب تاني… فبعد تداول أخبار عن حظر اللعبة، برزت تساؤلات حول عدم توفرها للطلب المسبق عبر متجر PlayStation اللبناني… لكن غيابها عن المتجر، ما بيعني صدور قرار رسمي بحظرها.
وبين النجاح العالمي والتساؤلات المحلية، GTA 6 تحوّلت لظاهرة عالمية… وبينما العالم عم يعيش تجربة Vice City، هل رح يبقى اللاعب اللبناني خارج هالمغامرة الإفتراضية؟
إقرأ المزيد


